काठमाडौँ । बैंकिङ प्रणालीमा लगानीयोग्य रकम अत्यधिक बढेपछि उत्पन्न अधिक तरलताको अवस्थालाई व्यवस्थापन गर्न नेपाल राष्ट्र बैंकले बजारबाट ४० अर्ब रुपैयाँ झिक्ने प्रक्रिया सुरु गरेको छ।
राष्ट्र बैंकले अल्पकालीन मौद्रिक उपकरण प्रयोग गर्दै बुधबार निक्षेप संकलनमार्फत उक्त रकम उठाउने भएको हो। ४९ दिनको अवधिका लागि संकलन गरिने यस निक्षेपको साँवा तथा ब्याज भुक्तानी आगामी असार ३ गते गरिनेछ।
यस प्रक्रियामा नेपाल राष्ट्र बैंकबाट अनुमति प्राप्त ‘क’, ‘ख’ र ‘ग’ वर्गका बैंक तथा वित्तीय संस्थाहरू सहभागी हुन सक्नेछन्। इच्छुक संस्थाले आज दिउँसो ३ बजेसम्म अनलाइन बिडिङ प्रणालीमार्फत आवेदन दिन सक्ने व्यवस्था गरिएको छ।
राष्ट्र बैंकका अनुसार लगानीकर्ताले न्यूनतम १० करोड रुपैयाँदेखि ५ करोडको गुणकमा अधिकतम ४० अर्ब रुपैयाँसम्मका लागि बोलकबोल गर्न सक्नेछन्।
पछिल्लो समय बैंक तथा वित्तीय संस्थाहरूमा निक्षेप निरन्तर बढे पनि सोही अनुपातमा कर्जा प्रवाह नहुनुका कारण प्रणालीमा अतिरिक्त तरलता जम्मा भएको छ। यसले ब्याजदरमा अस्वाभाविक उतारचढाव निम्त्याउन सक्ने जोखिमलाई नियन्त्रण गर्न राष्ट्र बैंकले यो कदम चालेको हो।
यस कदमलाई समग्र वित्तीय प्रणालीमा स्थिरता कायम गर्ने तथा मौद्रिक व्यवस्थापन सन्तुलित राख्ने उद्देश्यका रूपमा लिइएको छ।
