एजेन्सी । अमेरिकी राष्ट्रपति डोनाल्ड ट्रम्पले स्ट्रेट अफ हर्मुजमा रोकिएका व्यापारिक जहाजहरूलाई सुरक्षित निकास दिने घोषणा गरेपछि अन्तर्राष्ट्रिय बजारमा कच्चा तेलको मूल्य घट्न थालेको छ। आइतबार सामाजिक सञ्जालमार्फत सार्वजनिक गरिएको उक्त प्रतिबद्धतापछि सोमबार विश्व बजारमा तेलको मूल्यमा गिरावट देखिएको हो।
सोमबार ब्रेन्ट क्रुडको मूल्य ६४ सेन्टले घट्दै प्रतिब्यारेल १०७.५३ डलरमा कायम भएको छ। त्यस्तै, अमेरिकी वेस्ट टेक्सस इन्टरमिडिएट (डब्लुटीआई) को मूल्यमा पनि ८४ सेन्टले कमी आई प्रतिब्यारेल १०१.१० डलरमा झरेको छ।
राष्ट्रपति ट्रम्पले इरान, मध्यपूर्व तथा अमेरिकाको बृहत्तर हितलाई ध्यानमा राख्दै प्रतिबन्धित जलमार्गबाट व्यापारिक गतिविधि सहज बनाउने र जहाजहरूलाई सुरक्षित रूपमा मार्गदर्शन गर्ने प्रतिबद्धता जनाएका छन्। यस कदमले बजारमा सकारात्मक सन्देश प्रवाह भए पनि अमेरिका र इरानबीच दीर्घकालीन शान्ति सम्झौता हुन नसक्दा तेलको मूल्य अझै १०० डलरमाथि नै कायम रहेको छ।
हाल स्ट्रेट अफ हर्मुजमा व्यापारिक आवागमन पूर्ण रूपमा सहज भइसकेको छैन भने दुई देशबीच भइरहेका बहुपक्षीय वार्ताहरू पनि ठोस निष्कर्षमा पुग्न सकेका छैनन्।
राष्ट्रपति ट्रम्पले तेहरानसँगको आणविक सम्झौतालाई प्राथमिकतामा राखेका छन् भने इरानले युद्धको पूर्ण अन्त्य र खाडी क्षेत्रमा लगाइएको ढुवानी नाकाबन्दी नहटेसम्म आणविक विषयमा कुनै पनि छलफल नगर्ने अडान दोहोर्याएको छ।
यसैबीच, पेट्रोलियम निर्यातक देशहरूको संगठन (ओपेक प्लस) ले बजारमा माग र आपूर्तिको सन्तुलन कायम राख्न आगामी जुन महिनाका लागि तेल उत्पादन बढाउने निर्णय गरेको छ। नयाँ निर्णयअनुसार दैनिक १ लाख ८८ हजार ब्यारेल थप उत्पादन गरिनेछ, जसले आगामी दिनमा बजारको दबाब केही कम गर्ने अपेक्षा गरिएको छ।
