कम्पनीहरूलाई विवरण बुझाउने म्याद पुस मसान्तसम्म थप

काठमाडौं । कम्पनी रजिस्ट्रारको कार्यालयले कम्पनीहरूलाई आर्थिक वर्ष २०८२/८३ सम्मको वार्षिक विवरण तथा कर, शुल्क, दस्तुर र जरिवाना बुझाउने अवधि थप गरेको छ ।

कार्यालयले अन्तिम समयमा मात्रै विवरण तथा फाइलहरू पेस गर्ने प्रवृत्तिका कारण अनलाइन प्रणालीमा चाप पर्ने र सेवा प्रवाहमा अवरोध आउन सक्ने अवस्थालाई ध्यानमा राख्दै कम्पनीहरूलाई पुस मसान्तसम्मको अतिरिक्त समय दिएको हो ।

कम्पनी रजिस्ट्रारको कार्यालयले २०८२/८३ सम्मको कानुनबमोजिम लाग्ने कर, शुल्क, दस्तुर तथा जरिवाना बुझाउन बाँकी रहेका कम्पनीलाई उक्त सुविधा दिएको हो ।

कार्यालयले २०८३ कात्तिक ३ गते जारी गरेको सूचनाअनुसार कम्पनी ऐन, २०६३ बमोजिम दर्ता भएका कम्पनीले कारोबार सञ्चालनलाई निरन्तरता दिन वा कम्पनीको दर्ता खारेज गर्न चाहेमा आर्थिक ऐन, २०८३ को दफा ४८ बमोजिम बुझाउनुपर्ने कर, शुल्क, दस्तुर तथा जरिवाना दाखिला गर्नुपर्नेछ ।

यसअघि सरकारले आर्थिक ऐन, २०८३ को व्यवस्थाअनुसार कम्पनीहरूलाई उक्त रकम दाखिला गर्ने सुविधा दिएको थियो । तर अन्तिम समयमा विवरण तथा फाइल पेस गर्ने प्रवृत्तिका कारण कार्यालयको अनलाइन प्रणालीमा अत्यधिक चाप पर्ने र सेवा प्रवाह प्रभावित हुन सक्ने भन्दै कम्पनी रजिस्ट्रारको कार्यालयले समयमै विवरण पेस गर्न आग्रह गरेको छ ।

कार्यालयले कम्पनीहरूलाई अनलाइन प्रणालीमार्फत CAMIS मा आवश्यक विवरण पेस गरी कानुनबमोजिमको कर, शुल्क, दस्तुर तथा जरिवाना मिनाहासम्बन्धी सुविधाको लाभ लिन पनि अनुरोध गरेको छ ।