काठमाडौं । नेपालको शहरी फोहोर व्यवस्थापनमा विद्युतीय सवारीसाधन प्रयोगको नयाँ अभ्यास सुरु भएको छ। एमएडब्लू वृद्धि ले फोटोन मोटरको आधिकारिक वितरकको रूपमा कस्टमाइज गरिएको फोटोन टीएम १ इलेक्ट्रिक वेस्ट कलेक्सन भेहिकलका ११ युनिट ललितपुर महानगरपालिका लाई हस्तान्तरण गरेको छ।
नेपालमा शहरी फोहोर व्यवस्थापनका लागि विद्युतीय गाडी प्रयोग गरिएको यो पहिलो पहल हो। यसले व्यावसायिक विद्युतीय सवारी साधन केवल यातायात र ढुवानीमा मात्र नभई सार्वजनिक सेवा क्षेत्रमा पनि प्रभावकारी हुन सक्ने नयाँ सम्भावना देखाएको छ।
हस्तान्तरण गरिएका टीएम १ गाडीहरू सामान्य बजारका सवारीसाधन नभई फोहोर संकलनका लागि विशेष रूपमा तयार पारिएका हुन्। यसले संस्थागत आवश्यकताअनुसार व्यावसायिक ईभी समाधान विकास गर्ने एमएडब्लू वृद्धिको क्षमता पनि देखाएको छ।
यी विद्युतीय गाडी प्रयोगपछि फोहोर संकलन टोलीको कार्यदक्षता उल्लेखनीय रूपमा बढेको छ। पहिले तीनजनाको टोली आवश्यक पर्ने काम अब दुईजनाबाटै सम्पन्न हुन थालेको छ। साथै, यसले लैङ्गिक समावेशी रोजगार सिर्जना गर्दै फोहोर व्यवस्थापन क्षेत्रमा महिलाको सहभागिता बढाउन सहयोग गरेको छ।
ललितपुर महानगरपालिकाका मेयर चिरिबाबु महर्जन ले प्रदूषण नियन्त्रणलाई प्राथमिकता दिँदै विद्युतीय सवारीसाधन आवश्यक रहेको बताउँदै यो समाधानले महानगरको लक्ष्य पूरा गर्न सहयोग पुगेको प्रतिक्रिया दिएका छन्।
एमएडब्लू वृद्धि कमर्शियल भेहिकल प्रालिका सीईओ अनिल बराल ले यो परियोजना नेपालमा स्वच्छ र दिगो शहरी विकासतर्फको महत्वपूर्ण कदम भएको उल्लेख गर्दै भविष्यमा अझ व्यापक रूपमा विद्युतीय सवारी समाधान विस्तार गर्ने प्रतिबद्धता व्यक्त गरेका छन्।
एमएडब्लू वृद्धिसँग देशभर १४ भन्दा बढी बिक्री तथा सेवा केन्द्र र १७१ भन्दा बढी सीसीएस–२ डीसी फास्ट चार्जिङ स्टेसनको सञ्जाल रहेको छ। यसले नगरस्तरमा विद्युतीय सवारीसाधन सञ्चालनलाई थप सहज बनाएको कम्पनीले जनाएको छ।
ललितपुरमा सुरु भएको यो अभ्यासले विद्युतीय व्यावसायिक सवारीसाधन भविष्यको योजना मात्र नभई आजै व्यवहारिक रूपमा प्रयोग गर्न सकिने समाधान भएको स्पष्ट सन्देश दिएको छ।
