काठमाडौं । अमेरिकी राष्ट्रपति डोनाल्ड ट्रम्पले इरानसँगको युद्धविरामको समयसीमा थप गर्ने घोषणा गरेका छन् ।
ट्रम्पका अनुसार इरानी नेतृत्वले युद्ध अन्त्यका लागि “एकीकृत प्रस्ताव” नल्याएसम्म अमेरिकी सेनाले नियोजित आक्रमण स्थगित गर्नेछ । उनले यो निर्णय पाकिस्तानी मध्यस्थकर्ताहरूको अनुरोधमा गरिएको जानकारी दिएका छन् ।
सामाजिक सञ्जालमा ट्रम्पले लेख्दै भनेका छन्, “मैले हाम्रो सेनालाई नाकाबन्दी जारी राख्न र अन्य सबै हिसाबले तयार रहन निर्देशन दिएको छु । प्रस्ताव पेश नभएसम्म र छलफल निष्कर्षमा नपुगेसम्म युद्धविराम जारी रहनेछ ।”
यसअघि बुधबार समाप्त हुने भनिएको युद्धविरामलाई विस्तार गर्दै ट्रम्पले इरानप्रति आफ्नो कठोर अडानमा केही परिवर्तन ल्याएका छन् । उनले पहिले युद्धविराम नबढाउने र इरानी पूर्वाधारमा ठूलो आक्रमण गर्ने चेतावनी दिएका थिए । तर पछिल्लो निर्णयलाई उनले कूटनीतिक प्रयासलाई समय दिन गरिएको बताएका छन् ।
इरानले यस विषयमा आधिकारिक प्रतिक्रिया दिएको छैन । तर अर्ध-आधिकारिक समाचार संस्था ‘तस्निम’ ले तेहरानको धारणा पछि सार्वजनिक गरिने जनाएको छ ।
इरानी विदेशमन्त्री अब्बास अराघ्चीले अमेरिकी नौसैनिक नाकाबन्दीलाई ‘युद्धको कार्य’ भन्दै यसले युद्धविरामको उल्लंघन गरेको आरोप लगाएका छन् ।
पाकिस्तानका प्रधानमन्त्री शहबाज शरीफले भने युद्धविराम विस्तारको निर्णयको स्वागत गर्दै दोस्रो चरणको वार्ताबाट स्थायी शान्ति सम्झौता हुने आशा व्यक्त गरेका छन् ।
रिपोर्ट अनुसार फेब्रुअरी २८ पछि सुरु भएको तनावमा अमेरिका र इजरायलको आक्रमणपछि इरानका सर्वोच्च नेता अली खामेनीसहित केही उच्च अधिकारीहरूको मृत्यु भएको थियो । त्यसपछि नेतृत्वमा परिवर्तन भई मोज्तबा खामेनी अगाडि आएका छन् ।
अमेरिकाले इरानको आणविक कार्यक्रम बन्द गर्नुपर्ने, मिसाइल उत्पादन रोक्नुपर्ने र क्षेत्रीय सहयोगी समूहहरूलाई समर्थन बन्द गर्नुपर्ने माग राख्दै आएको छ । तर इरानले आफ्नो आणविक कार्यक्रम र सैन्य क्षमतामा कुनै सम्झौता नगर्ने अडान कायम राखेको छ ।
