काठमाडौं । नेपालको निजी क्षेत्रको अग्रणी छाता संगठन नेपाल उद्योग वाणिज्य महासंघ (एफएनसीसीआई) मा नयाँ नेतृत्वले औपचारिक रूपमा कार्यभार सम्हालेको छ। महासंघको विधानअनुसार वरिष्ठ उपाध्यक्षबाट स्वतः अध्यक्ष बन्ने प्रावधान अनुसार अञ्जन श्रेष्ठले अध्यक्षको जिम्मेवारी ग्रहण गरेका हुन्।
निवर्तमान अध्यक्ष चन्द्रप्रसाद ढकालले आफ्नो तीन वर्षे कार्यकाल सफलतापूर्वक सम्पन्न गर्दै पदबाट बिदा लिएका छन्। उनको कार्यकालमा निजी क्षेत्रको साख अभिवृद्धि, वैदेशिक लगानी प्रवर्द्धन तथा सरकार र निजी क्षेत्रबीच समन्वय सुदृढ बनाउने दिशामा उल्लेखनीय प्रगति भएको बताइएको छ। ढकालले आफ्नो कार्यकालमा साथ र सहयोग गर्ने सम्पूर्ण उद्यमी, व्यवसायी तथा महासंघका कर्मचारीप्रति आभार व्यक्त गर्दै नयाँ नेतृत्वलाई सफल कार्यकालको शुभकामना दिएका छन्।
नयाँ अध्यक्षको रूपमा जिम्मेवारी सम्हाल्दै अञ्जन श्रेष्ठले मुलुकको सुस्त बन्दै गएको अर्थतन्त्रलाई पुनः गतिशील बनाउने आफ्नो प्रमुख लक्ष्य रहेको स्पष्ट पारे। उनले उद्योगी–व्यवसायीका समस्या समाधान, लगानीमैत्री वातावरण निर्माण तथा नीतिगत सुधारका लागि सरकारसँग प्रभावकारी पहल गर्ने प्रतिबद्धता जनाए।
नेपालको अर्थतन्त्रमा ८० प्रतिशतभन्दा बढी योगदान दिने निजी क्षेत्रको नेतृत्व गर्ने यस संस्थामा नयाँ नेतृत्वको आगमनसँगै व्यवसायीहरूमा सकारात्मक ऊर्जा र नयाँ आशा जागेको देखिएको छ।
