काठमाडौँ । सुपरमाई हाईड्रोपावर कम्पनी लिमिटेड ले चालु आर्थिक वर्ष २०८२/८३ को तेस्रो त्रैमाससम्ममा आम्दानी र नाफा दुवैमा उल्लेखनीय सुधार गरेको छ। कम्पनीले सार्वजनिक गरेको अपरिष्कृत वित्तीय विवरणअनुसार खुद नाफा अघिल्लो वर्षको तुलनामा ८२.३१ प्रतिशतले वृद्धि भएको हो।
समीक्षा अवधिमा कम्पनीले ६ करोड ८९ लाख रुपैयाँ खुद नाफा आर्जन गरेको छ। अघिल्लो आर्थिक वर्षको सोही अवधिमा कम्पनीको नाफा ३ करोड ७७ लाख रुपैयाँ मात्र रहेको थियो।
विद्युत बिक्री आम्दानीमा आएको सुधारले नाफा वृद्धिमा मुख्य योगदान गरेको कम्पनीले जनाएको छ। विवरणअनुसार कम्पनीले विद्युत बिक्रीबाट १९ करोड ८६ लाख रुपैयाँ आम्दानी गरेको छ, जुन अघिल्लो वर्षको १३ करोड ८४ लाख रुपैयाँको तुलनामा ४३.५५ प्रतिशतले बढी हो।
आम्दानीसँगै कम्पनीका विभिन्न खर्चहरूमा पनि वृद्धि देखिएको छ। वित्त खर्च (फाइनान्स कस्ट) अघिल्लो वर्षको ३ करोड ७८ लाख रुपैयाँबाट बढेर ५ करोड ८७ लाख रुपैयाँ पुगेको छ।
त्यस्तै कर्मचारी खर्च २६ लाख ७७ हजार रुपैयाँ, प्रशासनिक खर्च ७१ लाख ३२ हजार रुपैयाँ तथा ह्रासकट्टी (डेप्रिसिएसन) खर्च ४ करोड ७४ लाख रुपैयाँ रहेको कम्पनीले जनाएको छ।
वित्तीय सूचकहरूमा पनि सुधार देखिएको छ। समीक्षा अवधिसम्म कम्पनीको प्रतिशेयर आम्दानी (ईपीएस) ७.०६ रुपैयाँ कायम भएको छ। त्यस्तै प्रतिशेयर नेटवर्थ १३०.९५ रुपैयाँ र प्रतिशेयर कुल सम्पत्तिको मूल्य २५५.१० रुपैयाँ रहेको कम्पनीले जनाएको छ।
समग्रमा विद्युत बिक्री आम्दानी वृद्धि र वित्तीय व्यवस्थापनमा आएको सुधारका कारण सुपरमाई हाईड्रोपावरको वित्तीय प्रदर्शन सकारात्मक बनेको देखिएको छ।
