पोखरा । ब्रिटिश प्रोफेसनल कलेज (BPC) ले अन्तर्राष्ट्रिय लेखा निकाय ACCA सँगको सहकार्यमा गण्डकी प्रदेशमा ‘अकाउन्टिङ एजुकेटर्स वर्कशप अन IFRS र NFRS’ आयोजना गर्ने भएको छ। लेखा तथा वित्त शिक्षणमा संलग्न शिक्षकहरूको क्षमता अभिवृद्धि गर्ने उद्देश्यसहित कार्यक्रम घोषणा गरिएको हो।
ब्रिटिश एजुकेशन ग्रुपअन्तर्गत सञ्चालन हुने र काठमाडौंमा प्लेटिनम-स्टाटस ACCA प्रोभाइडरको रूपमा परिचित BPC ले पोखरामा रहेका उच्च माध्यमिक तह (कक्षा ११ र १२) का लेखा तथा वित्त शिक्षकलाई लक्षित गर्दै अन्तर्राष्ट्रिय तथा राष्ट्रिय वित्तीय प्रतिवेदन मापदण्ड (IFRS र NFRS) सम्बन्धी विशेष प्रशिक्षण कार्यक्रम सञ्चालन गर्न लागेको जनाएको छ।
कार्यक्रम आगामी २०२६ जुन ६ मा पोखरा इभेन्ट सेन्टरस्थित सगरमाथा हलमा बिहान ९:३० बजेदेखि साँझ ५:३० बजेसम्म सञ्चालन हुनेछ। उक्त कार्यशालाले शिक्षकहरूलाई आधुनिक लेखा अभ्यास, वित्तीय रिपोर्टिङका अन्तर्राष्ट्रिय मापदण्ड तथा नेपालको वित्तीय प्रतिवेदन प्रणालीबारे गहिरो ज्ञान प्रदान गर्ने अपेक्षा गरिएको छ।
कार्यक्रममा एफसीसीए (FCCA) बिज्ञान्त आचार्यले प्रशिक्षकको रूपमा सत्र सञ्चालन गर्नेछन्। उनले IFRS, NFRS, समसामयिक लेखा अभ्यास तथा वित्तीय क्षेत्रका नयाँ प्रवृत्तिबारे विस्तृत छलफल गराउनेछन्।
BPC का प्रोफेसनल एजुकेशन प्रमुख दिपेन्द्र के. श्रेष्ठका अनुसार यो कार्यशाला शिक्षकहरूलाई विश्वस्तरीय शिक्षण मापदण्डसँग जोड्ने महत्वपूर्ण अवसर हो। उनले BPC/BEG ले उच्चस्तरीय व्यावसायिक शिक्षामा नयाँ मानक स्थापित गर्न निरन्तर प्रयास गरिरहेको बताए।
उनका अनुसार यस्तो कार्यक्रमले कक्षाकोठामा हुने शिक्षण र अन्तर्राष्ट्रिय उद्योग मापदण्डबीचको दूरी कम गर्न मद्दत गर्नेछ, जसले पोखराका शिक्षकहरूलाई अझ प्रभावकारी रूपमा विद्यार्थीलाई मार्गदर्शन गर्न सक्षम बनाउनेछ।
कार्यशाला केवल प्राविधिक प्रशिक्षणमा सीमित नभई शिक्षकहरूबीच सहकार्य, अनुभव आदान–प्रदान र नेटवर्किङ विस्तार गर्ने महत्वपूर्ण प्लेटफर्म हुने बताइएको छ।
ब्रिटिश प्रोफेसनल कलेज ब्रिटिश एजुकेशन ग्रुपको हिस्सा हो, जसअन्तर्गत काठमाडौंस्थित द ब्रिटिश कलेज लगायत नेपाल, क्यानडा, बेलायत र यूएईमा विभिन्न शैक्षिक संस्थाहरू सञ्चालनमा छन्।
ACCA सँगको सहकार्यमा सञ्चालन हुने यस्ता कार्यक्रममार्फत BPC ले लेखा शिक्षा क्षेत्रमा गुणस्तरीय विकास, शिक्षक सशक्तीकरण तथा अन्तर्राष्ट्रिय स्तरको व्यावसायिक दक्षता विस्तार गर्ने लक्ष्य लिएको जनाएको छ।
