काठमाडौं। रसुवा–त्रिशूली–भोटेकोशी क्षेत्रमा आएको विनाशकारी बाढीबाट प्रभावित समुदायको राहत तथा पुनःस्थापनाका लागि कुमारी बैंक लिमिटेडका कर्मचारीहरूले ४५ लाख ९७ हजार ३५३ रुपैयाँ ५० पैसा सहयोग गरेका छन्। बैंकका कर्मचारीहरूले स्वेच्छिक रूपमा आफ्नो तलबबाट रकम कट्टा गरी प्रधानमन्त्री दैवी प्रकोप उद्धार कोषमा उक्त रकम योगदान गरेका हुन्।
प्राकृतिक विपद्का कारण ठूलो मानवीय तथा भौतिक क्षति व्यहोरेका समुदायप्रति ऐक्यबद्धता जनाउँदै कर्मचारीहरूले व्यक्तिगत रूपमा योगदान गरेको बैंकले जनाएको छ। संकलित रकम प्रधानमन्त्री दैवी प्रकोप उद्धार कोषमार्फत प्रभावित नागरिकको राहत, उद्धार तथा पुनःस्थापनाका कार्यक्रममा उपयोग हुने विश्वास बैंकले लिएको छ।
कर्मचारीको स्वैच्छिक योगदानबाट मानवीय सहयोग
कुमारी बैंकका अनुसार कर्मचारीहरूको यो योगदानले मानवीय संवेदना, सामाजिक एकता र राष्ट्रप्रतिको उत्तरदायित्वलाई थप मजबुत बनाएको छ। बैंकले सामाजिक उत्तरदायित्वलाई प्राथमिकतामा राख्दै प्राकृतिक विपद्का समयमा प्रभावित समुदायलाई सहयोग गर्दै आएको जनाएको छ।
बाढीबाट प्रभावित नागरिकलाई राहत उपलब्ध गराउनेदेखि उद्धार, पुनःस्थापना तथा पुनःनिर्माणका कार्यमा सहयोग पुर्याउने उद्देश्यले बैंकले विभिन्न पहल गर्दै आएको छ।
यसअघि पनि ३ करोड रुपैयाँ सहयोग
कुमारी बैंकले यसअघि नै त्रिशूली–भोटेकोशी क्षेत्रमा आएको बाढीबाट प्रभावित नागरिकको राहत, उद्धार, पुनःस्थापना तथा पुनःनिर्माण कार्यमा सहयोग पुर्याउन प्रधानमन्त्री दैवी प्रकोप उद्धार कोषमा ३ करोड रुपैयाँ प्रदान गरेको थियो।
त्यसैगरी, बाढी प्रभावित क्षेत्रको उद्धार तथा राहत कार्यलाई प्रभावकारी बनाउन बैंकले गृह मन्त्रालयलाई ३९ लाख रुपैयाँ बराबरका विपद् व्यवस्थापन सामग्री उपलब्ध गराएको थियो।
बैंकले उपलब्ध गराएका सामग्रीमा अत्याधुनिक ड्रोन, पावर बैंक, जेनेरेटरलगायत विपद् व्यवस्थापनका लागि आवश्यक उपकरणहरू समावेश थिए। ती सामग्रीले प्रभावित क्षेत्रमा उद्धार तथा राहत कार्य सञ्चालन गर्न सहयोग पुर्याउने उद्देश्य राखिएको थियो।
कर्मचारीहरूको पछिल्लो स्वैच्छिक योगदान र बैंकले यसअघि उपलब्ध गराएको आर्थिक तथा सामग्रीगत सहयोगले बाढी प्रभावित समुदायको राहत, उद्धार र पुनःस्थापनाका प्रयासमा थप सहयोग पुग्ने अपेक्षा गरिएको छ।
