काठमाडौं। कामना सेवा विकास बैंकको सहकार्य तथा नेपाल चिकित्सक संघको आयोजनामा महिला चिकित्सकहरूका लागि वित्तीय साक्षरता कार्यक्रम सम्पन्न भएको छ। कार्यक्रममा नेपाल चिकित्सक संघका करिब ६० जनाभन्दा बढी महिला चिकित्सक सहभागी भएका थिए।
महिला चिकित्सकहरूको वित्तीय व्यवस्थापन, बजेट निर्माण, बचत, लगानी तथा कर व्यवस्थापनसम्बन्धी ज्ञान र सीप अभिवृद्धि गर्ने उद्देश्यले कार्यक्रम आयोजना गरिएको हो। कार्यक्रममा प्रस्तुतीकरण, अन्तरक्रिया तथा व्यावहारिक सहजीकरणमार्फत सहभागीहरूलाई व्यक्तिगत वित्तीय योजना र आर्थिक निर्णय प्रक्रियाबारे जानकारी प्रदान गरिएको थियो।
बजेटदेखि दीर्घकालीन वित्तीय सुरक्षासम्मका विषयमा छलफल
नेपाल चिकित्सक संघका अध्यक्ष डा. बद्री रिजालको अध्यक्षतामा सम्पन्न कार्यक्रमको सुरुवात गर्दै डा. सुजिता हिराचनले चिकित्सकहरूका लागि वित्तीय व्यवस्थापन, बजेट निर्धारण तथा कर व्यवस्थापनको आवश्यकता र महत्त्वबारे प्रकाश पारेकी थिइन्।
कार्यक्रममा वित्तीय साक्षरतासम्बन्धी विषयमा चार्टर्ड एकाउन्टेन्ट अनुपमा सङ्ग्रौला तथा कामना सेवा विकास बैंकका तर्फबाट डिजिटल अपरेसन विभाग प्रमुख जिनुसा पलिखे श्रेष्ठ र कर्जा अधिकृत सूर्य कान्त न्यौपानेले सहजीकरण गरेका थिए।
उनीहरूले सहभागी महिला चिकित्सकहरूलाई व्यक्तिगत वित्तीय योजना निर्माण, बजेट व्यवस्थापन, नियमित बचत, लगानीका विकल्प, कर व्यवस्थापन तथा दीर्घकालीन वित्तीय सुरक्षा सुनिश्चित गर्ने उपायबारे व्यावहारिक जानकारी दिएका थिए।
व्यक्तिगत र पारिवारिक आर्थिक सुरक्षामा जोड
कार्यक्रमका अध्यक्ष तथा नेपाल चिकित्सक संघका अध्यक्ष डा. बद्री रिजालले चिकित्सकहरूले आफ्नो पेसागत जिम्मेवारीसँगै वित्तीय व्यवस्थापनलाई पनि उत्तिकै प्राथमिकता दिनुपर्ने बताए। उनले चिकित्सकहरूको व्यावसायिक जीवनका साथै व्यक्तिगत तथा पारिवारिक आर्थिक सुरक्षा सुनिश्चित गर्न वित्तीय ज्ञान र व्यवस्थित वित्तीय योजना महत्त्वपूर्ण रहेको उल्लेख गरे।
कार्यक्रम सफल बनाउन सहयोग गरेकोमा उनले कामना सेवा विकास बैंक तथा सम्पूर्ण सम्बन्धित पक्षलाई धन्यवाद ज्ञापन गरे।
त्यसैगरी, कार्यक्रम संयोजक डा. निशा आचार्यले महिला चिकित्सकहरूका लागि वित्तीय साक्षरता महत्त्वपूर्ण र आवश्यक विषय भएको बताइन्। यस्ता कार्यक्रमले उनीहरूको आर्थिक निर्णय क्षमता अभिवृद्धि गर्न तथा आम्दानीको उचित व्यवस्थापन गर्न सहयोग पुर्याउने उनको भनाइ थियो।
चिकित्सक संघका पदाधिकारी तथा अतिथिको सहभागिता
कार्यक्रममा नेपाल चिकित्सक संघका पूर्वअध्यक्ष डा. लोचन कार्की विशेष अतिथिका रूपमा उपस्थित थिए। नेपाल मेडिकल काउन्सिलका सदस्य डा. युबिन यादव तथा नेपाल चिकित्सक संघकी कार्यकारी सदस्य डा. बिना श्रेष्ठ पनि अतिथिका रूपमा सहभागी थिए।
वित्तीय साक्षरता र समावेशीकरणमा बैंकको प्रतिबद्धता
महिला चिकित्सकहरूको व्यावसायिक विकाससँगै आर्थिक सशक्तीकरण र वित्तीय सचेतना अभिवृद्धि गर्ने उद्देश्यले आयोजना गरिएको यस कार्यक्रमले सहभागीहरूलाई आम्दानीको उचित व्यवस्थापन, भविष्यका लागि वित्तीय योजना निर्माण तथा आर्थिक निर्णय लिन थप सक्षम बनाउने विश्वास कामना सेवा विकास बैंकले लिएको छ।
बैंकले वित्तीय पहुँच विस्तार, वित्तीय साक्षरता अभिवृद्धि तथा वित्तीय समावेशीकरणका लागि विभिन्न कार्यक्रम सञ्चालन गर्दै आएको जनाएको छ। साथै, नेपाल सरकारले लिएको लक्ष्य प्राप्तिमा योगदान पुर्याउन आगामी दिनमा पनि यस्ता कार्यक्रमलाई निरन्तरता दिने प्रतिबद्धता बैंकले व्यक्त गरेको छ।
