भारतको बिहारमा गङ्गा नदी पार गर्ने क्रममा भएको डुङ्गा दुर्घटनाले ठुलो मानवीय क्षति निम्त्याएको छ।
वैशाखी जिल्लाको राघोपुरमा डुङ्गा पल्टिँदा कम्तीमा १३ जनाको मृत्यु भएको छ। मृतकमध्ये अधिकांश बालबालिका रहेको खबरले स्थानीय क्षेत्र शोकमा डुबेको छ।
भारतीय सञ्चारमाध्यमका अनुसार मंगलवार राति करिब साढे ८ बजे भोजमा सहभागी हुन जाँदै गरेका २५ जनाभन्दा बढी व्यक्ति एउटा सानो डुङ्गामा सवार थिए। गङ्गा नदी पार गर्ने क्रममा अचानक डुङ्गा पल्टिएपछि यात्रुहरू नदीमा डुबेका थिए।
दुर्घटनापछि घटनास्थलमा उद्धार तथा खोजी कार्य सञ्चालन गरिएको छ। घाइतेमध्ये सात जनालाई थप उपचारका लागि पटना मेडिकल कलेज तथा अस्पताल (पीएमसीएच) पठाइएको वैशालीकी जिल्ला अधिकारी वर्षा सिंहले जानकारी दिएकी छन्। उद्धारका लागि राज्य विपद् प्रतिकार्य बल (एसडीआरएफ)को टोली परिचालन गरिएको बीबीसी हिन्दीले जनाएको छ ।
बालबालिकाको मृत्युले गाउँमा शोक
दुर्घटनामा ज्यान गुमाउनेमध्ये अधिकांश ६ देखि १५ वर्ष उमेर अन समूहका बालबालिका रहेको बताइएको छ। प्रहरीले मृतकमध्ये पिंकी, अंकिता, सुनीता, आर्यन, अलिशा, सिकी, भोणु र मीरासहित केहीको पहिचान खुलेको जनाएको छ।
सानो डुङ्गामा क्षमताभन्दा बढी यात्रु सवार थिए वा अन्य कारणले दुर्घटना भएको हो भन्ने विषयमा उपलब्ध विवरणमा स्पष्ट खुलाइएको छैन। घटनाबारे थप विवरण आउन बाँकी छ।
दुर्घटनापछि उद्धार व्यवस्थापन र प्रशासनको भूमिकालाई लिएर स्थानीय बासिन्दा आक्रोशित बनेका छन्। घटनास्थल पुगेकी जिल्ला अधिकारी वर्षा सिंहलाई स्थानीयले घेराउ गर्दै विरोध जनाएका छन्। उनीहरूले प्रशासनविरुद्ध नाराबाजीसमेत गरेका थिए। दुर्घटनाले निम्त्याएको ठुलो मानवीय क्षतिपछि राघोपुर क्षेत्रमा शोकसँगै आक्रोश पनि फैलिएको छ।
दुर्घटनापछि बिहार सरकारले मृतकका परिवारलाई जनही चार लाख भारतीय रुपैयाँ राहत उपलब्ध गराउने घोषणा गरेको छ। त्यस्तै, भारतीय प्रधानमन्त्री कार्यालय (पीएमओ) का तर्फबाट मृतकका परिवारलाई जनही दुई लाख भारतीय रुपैयाँ दिने घोषणा गरिएको विवरणमा उल्लेख छ।
यसअनुसार मृतकका परिवारले दुवै स्रोतबाट गरी जनही छ लाख भारतीय रुपैयाँ राहत पाउनेछन्। घाइतेलाई जनही ५० हजार भारतीय रुपैयाँ उपलब्ध गराउने घोषणा गरिएको पनि भारतीय सञ्चारमाध्यमले जनाएका छन्।
गङ्गा नदी पार गर्ने क्रममा भएको यस दुर्घटनाले नदीमा सुरक्षित आवागमन, डुंगाको क्षमता र यात्रुको सुरक्षासम्बन्धी प्रश्नसमेत उठाएको छ। घटनाको विस्तृत विवरण र दुर्घटनाको कारणबारे थप जानकारी आउन बाँकी छ।
