राजधानीको थापाथली, जुन देशकै प्रमुख अटोमोबाइल हब मानिन्थ्यो, गत भदौ २३–२४ गते भएको जेनजि आन्दोलन पछि सुनसान बनेको छ। दशैं–तिहारको मुखमा सधैं रौनक बढाउने ग्राहकको भीड, नयाँ मोडेल र रंगीन ब्यानर अहिले धुवाँ, आगो र भग्नावशेषले भरिएको दृश्य बनेको छ।
आन्दोलनका क्रममा अराजक प्रदर्शनकारीबाट करिब आधा दर्जन शोरुममा आंशिक वा पूर्ण क्षति पुगेको छ। सीजी मोटर्स, टाटा, महिन्द्रा, सुजुकी, हुन्डाई र सिट्रोन लगायतका ब्रान्ड प्रभावित भएका छन्। सीजी मोटर्सका १६ युनिट नयाँ गाडी पूर्ण रूपमा जलेका छन्। टाटा शोरुममा चार विद्युतीय गाडी जलेका छन् भने दुई चोरी गरिएका गाडी जलेको अवस्थामा फेला परेका छन्। महिन्द्राका पाँच गाडी जलेका छन्, त्यसमध्ये इलेक्ट्रिक मोडेल पूर्ण रूपमा ध्वस्त भएको छ। सुजुकीका ११ गाडीमा क्षति पुगेको छ, दुई पूर्ण जलेका छन्।
जेनजि आन्दोलनले व्यवसायीको लगानी मात्र नभई ग्राहकको भरोसामा पनि गम्भीर असर पारेको छ। केही शोरुममा ६०–७० प्रतिशत बुकिङ रद्द भएका छन्। ग्राहकहरूले राजनीतिक अस्थिरता र आन्दोलनका कारण गाडी खरिदमा पछि हटेका छन्।
यातायात र ढुवानीमा पनि चुनौती बढेको छ। चीनबाट आयात हुने सवारीसाधनमध्ये करिब ६५ प्रतिशत रोकिएको छ। तातोपानी र रसुवागढी नाका बाढी–पहिरोले अवरुद्ध भएपछि महँगो र ढिलो हुने कोरला नाका प्रयोग गर्नुपर्ने अवस्था आएको छ।
नेपाली अटो बजारमा प्रत्येक वर्षको ४०–५० प्रतिशत बिक्री दशैं–तिहारमै हुने गरेको छ। तर यस वर्ष आन्दोलनले बिक्रीमा ठूलो गिरावट ल्याएको छ र उद्योगको भावनात्मक ऊर्जा, ग्राहकको भरोसा र लगानी वातावरणमा दीर्घकालीन असर परेको छ। व्यवसायीहरूले हालको राजनीतिक अस्थिरता र सुरक्षा अभावका कारण बजार स्थिर हुन कम्तीमा दुई–तीन वर्ष लाग्ने अनुमान गरेका छन्।
यद्यपि, सरकारले प्रभावित अटो उद्योगलाई पुनः सशक्त बनाउन विशेष राहत प्याकेज घोषणा गरेको छ। नाडा अटोमोबाइल्स एशोसिएशनले यसलाई स्वागत गर्दै उद्योग पुनर्निर्माणमा सहकार्य थप बलियो हुने विश्वास व्यक्त गरेको छ। राहत प्याकेजमा ५० प्रतिशत अग्रिम बीमा भुक्तानी, ८० प्रतिशत बैंक कर्जा सुविधा, भन्सार छुट, कर सहुलियत र रोजगारी सुरक्षा समावेश छन्।
उद्योग पुनरुद्धारका लागि सरकार र निजी क्षेत्रबीच सहकार्य बलियो बनाउँदै, नाडाले समग्र अटो उद्योगमा सुधारका लागि रोडम्याप र पूर्वाधार विकासमा जोड दिन सरकारलाई आग्रह गरेको छ।
