काठमाडौं। बैंकिङ प्रणालीमा अधिक तरलता व्यवस्थापन गर्न नेपाल राष्ट्र बैंकले आज माघ १८ गते ३० अर्ब रुपैयाँ बराबरको निक्षेप संकलन गर्ने भएको छ। यस निक्षेप संकलन उपकरणमार्फत केन्द्रीय बैंकले ५२ दिनका लागि रकम तान्नेछ।
राष्ट्र बैंकको मौद्रिक व्यवस्थापन विभागका अनुसार, दिउँसो २:०० बजेसम्म अनलाइन बिडिङ प्रणाली मार्फत इच्छुक बैंक र वित्तीय संस्थाले ब्याजदरमा बोलकबोल गर्न सक्नेछन्। बहुब्याजदरमा पनि बहुबोलकबोल गर्ने व्यवस्था गरिएको छ।
बोलकबोल प्रक्रियामा राष्ट्र बैंकबाट इजाजतपत्र प्राप्त ‘क’, ‘ख’ र ‘ग’ वर्गका बैंक तथा वित्तीय संस्थाहरू मात्र सहभागी हुन पाउनेछन्। निक्षेप दिन चाहने संस्थाले कम्तिमा १० करोड रुपैयाँ र अधिकतम ५ करोड रुपैयाँको अन्तरमा भाग गर्दै कुल आह्वान रकमसम्म बोलकबोल गर्न सक्नेछन्।
राष्ट्र बैंकले जनाएको छ, आज निष्कासन गरिने निक्षेपको साँवा र ब्याज भुक्तानी २०८२ चैत ११ गते गरिनेछ। बोलकबोलमा सबैभन्दा कम ब्याजदर प्रस्ताव गर्ने संस्थालाई प्राथमिकता दिइनेछ।
