काठमाडौं-नेपाल आर्थिक संघ (NEA) को ३६औँ वार्षिक साधारण सभाले आगामी कार्यकालका लागि नयाँ कार्यसमिति चयन गरेको छ। प्रा. डा. विश्वम्भर प्याकुर्याल सर्वसम्मत रूपमा अध्यक्षमा निर्वाचित हुनुभएको छ। उक्त साधारण सभा मे २ मा काठमाडौंमा सम्पन्न भएको हो।
निर्वाचनपछिको सम्बोधनमा प्रा. डा. प्याकुर्यालले संघ स्थापना भएयताका चुनौतीहरूको स्मरण गर्दै हालका वर्षहरूमा राष्ट्रिय तथा अन्तर्राष्ट्रिय संस्थाहरूको सहयोगमा विविध कार्यक्रम सञ्चालन गरी संघले आफ्नो उपस्थिति सुदृढ बनाएको उल्लेख गर्नुभयो। विश्व बैंक, यूएनडीपी, नेपाल सरकार लगायत संस्थासँग सहकार्य गर्दै आर्थिक नीति, अनुसन्धान तथा समसामयिक विकासका विषयमा छलफल अघि बढाइएको उहाँले बताउनुभयो। साथै, निकट भविष्यमा प्रदेशस्तरमा कार्यक्रम विस्तार गर्ने योजना रहेको पनि उहाँले जानकारी दिनुभयो।
दक्षिण एसियाका अर्थशास्त्रका विद्यार्थी तथा नेपालका धेरै सहभागीहरूलाई सहभागी गराई सार्क क्षेत्रका प्रमुख आर्थिक मुद्दाहरूमा केन्द्रित क्षेत्रीय कार्यक्रम आयोजना गरिएको थियो। यसले संघको पहिचान र पहुँच उल्लेखनीय रूपमा विस्तार भएको प्रा. प्याकुर्यालले बताउनुभयो।
उपाध्यक्ष पदमा डा. पोषराज पाण्डे र प्रा. डा. गोविन्द नेपाल सर्वसम्मत रूपमा निर्वाचित हुनुभएको छ। महासचिवमा डा. गोपाल प्रसाद तिवारी निर्वाचित हुनुभयो, उहाँले संघले विगतमा सञ्चालन गरेका नीतिगत तथा कार्यान्वयन तहका गतिविधिहरू-जस्तै नीतिगत बहस, क्षेत्रीय तथा अन्तर्राष्ट्रिय कार्यक्रमहरूका बारेमा संक्षिप्त जानकारी दिनुभयो।
सचिव पदमा डा. खोमराज खरेल निर्वाचित हुनुभएको छ भने कोषाध्यक्षमा प्रा. डा. शान्ता सिंह चयन हुनुभएको छ।
नवनिर्वाचित कार्यसमिति सदस्यहरूमा प्रा. डा. विजय श्रेष्ठ, प्रा. डा. केशवराज खड्का, प्रा. डा. शिवराज अधिकारी, प्रा. डा. कुसुम शाक्य, प्रा. डा. माधवप्रसाद दाहाल, डा. विष्णुदेव पन्त, डा. मणिकुमार नेपाल, डा. यादवमणि उपाध्याय तथा सुश्री जमुना श्रेष्ठ रहनुभएको छ।
