नेपाल युवा महिला क्रिकेट टोलीले यू–१९ महिला बेल्ट एन्ड रोड सिरिजमा हङकङ चाइनालाई ९२ रनले पराजित गरेको छ।
चीनको सान्सी टाउन क्रिकेट सेन्टरमा आज बिहीबार भएको खेलमा नेपालले दिएको १ सय ४७ रनको लक्ष्य पछ्याएको हङकङ १८ ओभरमा ५४ रनमै अलआउट भयो।
नेपालका बलरले उत्कृष्ट प्रदर्शन गर्दै हङकङलाई सस्तैमा समेटे। नेपालका लागि मनिषा चौधरी र रचना चौधरीले समान ३ विकेट लिइन्। साक्षी यादवले २ र आशिकाकुमारी महराले १ विकेट लिइन्।
त्यसअघि टस जितेको हङकङले ब्याटिङ रोजेको थियो। पहिले ब्याटिङ गरेको नेपालले १९।५ ओभरमा सबै विकेट गुमाएर १ सय ४६ रन बनाएको थियो।
नेपालका लागि सोनी पाख्रिनले सर्वाधिक ४४ रन बनाइन्। उनले २८ बलमा ५ चौका र ३ छक्का प्रहार गरिन्। सवित्री धामीले ३६ रन जोड्दा त्रिशना विश्वकर्माले १२ तथा एन्जिला पाठकले १३ रन बनाइन्।
हङकङका लागि स्टोर्म पार्करले २, अकेशा साहनी, अर्ना सेन्टिलभेल, मान केइ लिउङ र होइ चिङ पुनले समान १ विकेट लिए। नेपाली टोलीकी कप्तान सोनी प्लेयर अफ द म्याच घोषित भइन्।
नेपालले पहिलो खेलमा थाइल्यान्डलाई ७ विकेटले हराएको छ। नेपाल र चीनबीचको खेल वर्षाका कारण रद्द भएको थियो।
