शाइन रेसुङ्गा डेभलपमेण्ट बैंक लिमिटेडले असार ३२ गतेदेखि निष्काशनमा ल्याएको ऋणपत्र (डिबेञ्चर) मा आवेदन दिने आज अन्तिम दिन हो।
बैंकले १० वर्ष अवधिका लागि वार्षिक ८ प्रतिशत स्थिर ब्याजदरमा ‘शाइन रेसुङ्गा डिबेञ्चर’ सार्वजनिक निष्काशनमा ल्याएको हो। कुल १ अर्ब रुपैयाँ बराबरको १० लाख कित्ता ऋणपत्र प्रतिकित्ता १,००० रुपैयाँ दरमा बिक्री खुला गरिएको हो।
जसमा ६० प्रतिशत अर्थात ६ लाख कित्ता ऋणपत्र (६० करोड रुपैयाँ बराबर) व्यक्तिगत तवरबाट बाँडफाँट गरिनेछ भने बाँकी ४ लाख कित्ता (४० करोड रुपैयाँ बराबर) सर्वसाधारणका लागि सार्वजनिक निष्काशन गरिएको हो।
सर्वसाधारणतर्फको कोटामध्ये ५ प्रतिशत अर्थात २० हजार कित्ता ऋणपत्र सामूहिक लगानी कोषहरूका लागि छुट्याइएको छ।यस ऋणपत्रमा न्यूनतम २५ कित्ता आवेदन दिनुपर्नेछ भने अधिकतम ५ लाख कित्तासम्मका लागि आवेदन दिन सकिने व्यवस्था गरिएको छ।
ऋणपत्र निष्काशन तथा बिक्री व्यवस्थापनको जिम्मेवारी एनआईएमबी एस क्यापिटल लिमिटेडले लिएको छ।
