काठमाडौं । नेपालमा सञ्चालनमा रहेका वाणिज्य बैंकहरूले २०८३ सालको असोज महिनाका लागि नयाँ ब्याजदर सार्वजनिक गरेका छन्। अधिकांश बैंकले भदौकै ब्याजदरलाई निरन्तरता दिएका छन् भने दुई बैंकले व्यक्तिगत मुद्दती निक्षेपको अधिकतम ब्याजदर घटाएका छन्।
असोजका लागि स्ट्यान्डर्ड चार्टर्ड बैंक नेपाल र कुमारी बैंकले व्यक्तिगत मुद्दती निक्षेपको अधिकतम ब्याजदर घटाएका हुन्। स्ट्यान्डर्ड चार्टर्ड बैंकले भदौमा रहेको ३.८० प्रतिशतलाई घटाएर असोजमा ३.७५ प्रतिशत कायम गरेको छ। त्यस्तै, कुमारी बैंकले अधिकतम ब्याजदर ३.४६ प्रतिशतबाट घटाएर ३.४३ प्रतिशतमा झारेको छ।
यससँगै असोजमा वाणिज्य बैंकहरूको व्यक्तिगत मुद्दती निक्षेपको अधिकतम ब्याजदर ३.४३ प्रतिशतदेखि ४.५५ प्रतिशतसम्म कायम भएको छ।
१७ बैंकको ब्याजदर यथावत्
असोजमा सिटिजन्स बैंक, ग्लोबल आईएमई बैंक, माछापुच्छ्रे बैंक, नबिल बैंक, नेपाल बैंक, एनआईसी एशिया बैंक, एनएमबी बैंक, प्राइम कमर्सियल बैंक, राष्ट्रिय वाणिज्य बैंक, नेपाल एसबीआई बैंक, सिद्धार्थ बैंक, प्रभु बैंक, हिमालयन बैंक, सानिमा बैंक, एभरेस्ट बैंक, लक्ष्मी सनराइज बैंक र नेपाल इन्भेस्टमेन्ट मेगा बैंकले भदौकै ब्याजदरलाई निरन्तरता दिएका छन्।
बैंकहरूको ब्याजदरमा ठूलो परिवर्तन नआएपछि असोजमा समग्र निक्षेप ब्याजदरको अवस्था तुलनात्मक रूपमा स्थिर देखिएको छ।
प्रभु बैंकको मुद्दतीमा सबैभन्दा बढी ब्याज
असोजमा व्यक्तिगत मुद्दती निक्षेपमा सबैभन्दा बढी अधिकतम ब्याजदर प्रभु बैंकले ४.५५ प्रतिशत तोकेको छ। त्यसपछि माछापुच्छ्रे बैंक, एनएमबी बैंक, सानिमा बैंक र नेपाल इन्भेस्टमेन्ट मेगा बैंकले समान ४.५० प्रतिशत अधिकतम ब्याजदर निर्धारण गरेका छन्।
त्यस्तै, नबिल बैंकले ४.२५ प्रतिशत, नेपाल बैंकले ४.१५ प्रतिशत र नेपाल एसबीआई बैंकले ४.१० प्रतिशत अधिकतम ब्याजदर कायम गरेका छन्। ग्लोबल आईएमई बैंक, एनआईसी एशिया बैंक, प्राइम कमर्सियल बैंक, राष्ट्रिय वाणिज्य बैंक, हिमालयन बैंक र लक्ष्मी सनराइज बैंकले व्यक्तिगत मुद्दती निक्षेपमा अधिकतम ४ प्रतिशत ब्याजदर निर्धारण गरेका छन्।
त्यसैगरी, सिटिजन्स बैंकले ३.८५ प्रतिशत, सिद्धार्थ बैंकले ३.७६ प्रतिशत, स्ट्यान्डर्ड चार्टर्ड बैंक नेपालले ३.७५ प्रतिशत, एभरेस्ट बैंकले ३.५० प्रतिशत र कुमारी बैंकले ३.४३ प्रतिशत अधिकतम ब्याजदर तोकेका छन्।
असोजको ब्याजदर विवरणले अधिकांश वाणिज्य बैंकले अघिल्लो महिनाकै दरलाई निरन्तरता दिँदा व्यक्तिगत मुद्दती निक्षेपतर्फ सीमित बैंकले मात्रै सामान्य दर समायोजन गरेको देखाएको छ।
