काठमाडौं, असोज १४ । सूर्योदय वोमी लघुवित्त वित्तीय संस्था लिमिटेडले डेपुटी प्रमुख कार्यकारी अधिकृत (डेपुटी सीईओ) पदका लागि दरखास्त आह्वान गरेको छ। संस्थाले असोज १४, २०८३ मा एक सूचना प्रकाशित गर्दै योग्य नेपाली नागरिकबाट करार सेवामा पदपूर्ति गर्ने गरी आवेदन माग गरेको हो।
संस्थाले डेपुटी प्रमुख कार्यकारी अधिकृत पदमा एक जना नियुक्त गर्न लागेको हो। उक्त पदका लागि इच्छुक तथा योग्यता पुगेका नेपाली नागरिकले आगामी कात्तिक १३, २०८३ भित्र आवेदन पेस गर्न सक्नेछन्।
शैक्षिक योग्यता र अनुभव
डेपुटी प्रमुख कार्यकारी अधिकृत पदका लागि मान्यता प्राप्त शिक्षण संस्थाबाट स्नातकोत्तर तह वा सोसरह उत्तीर्ण गरी बैंक तथा वित्तीय संस्था वा लघुवित्त वित्तीय संस्थामा कम्तीमा पाँच वर्ष व्यवस्थापकीय तहमा काम गरेको अनुभव हुनुपर्नेछ।
त्यस्तै, स्नातक तह वा सोसरह उत्तीर्ण गरेका उम्मेदवारले बैंक तथा वित्तीय संस्था वा लघुवित्त वित्तीय संस्थामा कम्तीमा सात वर्ष व्यवस्थापकीय तहमा काम गरेको अनुभव भएमा आवेदन दिन सक्नेछन्। अर्थशास्त्र, व्यवस्थापन वा चार्टर्ड एकाउन्टेन्सी विषयमा शैक्षिक योग्यता हासिल गरेका उम्मेदवारलाई विशेष प्राथमिकता दिइने संस्थाले जनाएको छ।
आवेदन दिने उम्मेदवारको उमेर आवेदन दिने अन्तिम मितिसम्म कम्तीमा ३५ वर्ष पूरा भएको र ५५ वर्ष ननाघेको हुनुपर्नेछ।
तीन वर्षे करार अवधि, कार्यसम्पादनका आधारमा नवीकरण
संस्थाले डेपुटी प्रमुख कार्यकारी अधिकृतलाई तीन वर्षका लागि करार सेवामा नियुक्त गर्नेछ। नियुक्त व्यक्तिको कार्यसम्पादनका आधारमा करार अवधि नवीकरण गर्न सकिने व्यवस्था गरिएको छ।
उम्मेदवार छनोटका लागि सुरुमा प्राप्त आवेदनबाट संक्षिप्त सूची तयार गरिनेछ। संक्षिप्त सूचीमा परेका उम्मेदवारले संस्थाको रणनीतिक व्यावसायिक योजना प्रस्तुत गर्नुपर्नेछ। त्यसपछि अन्तर्वार्तामार्फत अन्तिम उम्मेदवार छनोट गरिनेछ।
इमेलमार्फत आवेदन दिन सकिने
उक्त पदका लागि इच्छुक उम्मेदवारले आवश्यक विवरण तथा कागजातसहित आफ्नो आवेदन [email protected] इमेल ठेगानामार्फत पेस गर्नुपर्नेछ। आवेदन दिने अन्तिम मिति २०८३ साल कात्तिक १३ गते तोकिएको छ।
संस्थाको कर्पोरेट कार्यालय ललितपुरको महालक्ष्मी नगरपालिका–४, इमाडोलमा रहेको छ। थप जानकारीका लागि ०१–५९१२७५२ र ०१–५९१२७५३ नम्बरमा सम्पर्क गर्न सकिने संस्थाले जनाएको छ।
