काठमाडौं । ग्लोबल आइएमई बैंक लिमिटेडले नेपालका किसान, कृषि उद्यमी तथा कृषि व्यवसायमा संलग्न व्यक्ति तथा संस्थालाई लक्षित गर्दै ‘ग्लोबल आइएमई कृषि कर्जा’ सञ्चालनमा ल्याएको छ। बैंकले कृषि क्षेत्रका विभिन्न आवश्यकता पूरा गर्न न्यूनतम ५ लाख रुपैयाँदेखि अधिकतम १ करोड रुपैयाँसम्म कर्जा उपलब्ध गराउने व्यवस्था गरेको छ।
बैंकका अनुसार कृषि व्यवसायको प्रकृति, लगानीको आवश्यकता तथा नगद प्रवाहलाई ध्यानमा राख्दै विभिन्न प्रकारका कर्जा सुविधा उपलब्ध गराइएको छ। आवश्यक सम्पूर्ण कागजात पेस भएपछि कर्जा स्वीकृतिको प्रक्रिया करिब तीन कार्यदिनभित्र पूरा गर्ने गरी द्रुत प्रक्रियाको व्यवस्था गरिएको छ।
विभिन्न प्रयोजनका लागि कर्जा सुविधा
कृषि कर्जाअन्तर्गत मेसिनरी, ट्र्याक्टर, ट्रक, शीत भण्डार, कृषि संरचना निर्माण तथा जग्गा वा पूर्वाधार विकासका लागि अधिकतम पाँच वर्ष अवधिको सावधिक कर्जा लिन सकिनेछ।
त्यस्तै, व्यवसायको स्थायी चालु पुँजी आवश्यकता पूरा गर्न चालु पुँजी सावधिक कर्जा उपलब्ध हुनेछ। मौसमी वा अल्पकालीन रूपमा उतारचढाव हुने सञ्चालन खर्च व्यवस्थापनका लागि नगद कर्जा लिन सकिनेछ। यस्तो कर्जा एक वर्षमा नवीकरण गर्न सकिने व्यवस्था रहेको छ।
कृषि उत्पादन तथा सामग्री ढुवानीका लागि आवश्यक सवारीसाधन खरिद गर्न हायर पर्चेज कर्जा समेत उपलब्ध हुनेछ। कृषि व्यवसायीले आपूर्तिकर्ता तथा अन्य सरोकारवालासँग कारोबारका क्रममा आवश्यक वित्तीय विश्वसनीयता कायम गर्न बैंक जमानत सुविधा पनि लिन सक्नेछन्।
आम्दानीअनुसार किस्ता तिर्न सकिने
कृषि व्यवसायको उत्पादन तथा आम्दानी चक्रलाई ध्यानमा राख्दै बैंकले कर्जा भुक्तानीमा विभिन्न विकल्प उपलब्ध गराएको छ।
ग्राहकले समान मासिक किस्ता, समान त्रैमासिक किस्ता वा त्रैमासिक रूपमा ब्याज भुक्तानी गर्ने विकल्प रोज्न सक्नेछन्। कर्जाको न्यूनतम अवधि ६ महिनाबाट सुरु हुने बैंकले जनाएको छ।
तीन कार्यदिनमा प्रक्रिया
बैंकले कृषि कर्जाको आवेदन प्रक्रियालाई छिटो बनाउन द्रुत स्वीकृति प्रणाली अपनाएको छ। आवश्यक सम्पूर्ण कागजात पेस भएपछि करिब तीन कार्यदिनभित्र कर्जा स्वीकृतिको प्रक्रिया पूरा गर्ने बैंकले जनाएको छ।
यसका साथै बैंकले कृषि वस्तु तथा व्यवसायको प्रकृतिअनुसार कर्जा व्यवस्थापनसम्बन्धी परामर्श र कृषि क्षेत्रका लागि विशेष सल्लाह सेवा पनि उपलब्ध गराउने जनाएको छ।
कर्जाका लागि आवश्यक कागजात
कर्जा लिन इच्छुक व्यक्ति, व्यवसाय तथा जमानीकर्ताले विभिन्न व्यक्तिगत, व्यावसायिक तथा सम्पत्तिसम्बन्धी कागजात पेस गर्नुपर्नेछ।
व्यक्तिगत परिचयका लागि आवेदक, व्यवसायका सञ्चालक, साझेदार, सेयरधनी तथा जमानीकर्ताको नागरिकताको प्रमाणपत्रको प्रतिलिपि र पासपोर्ट आकारको फोटो आवश्यक पर्नेछ।
त्यस्तै, खुद सम्पत्ति विवरण, पारिवारिक विवरण तथा अन्य बैंकमा रहेको कर्जा वा बैंकिङ कारोबारसम्बन्धी घोषणा पेस गर्नुपर्नेछ।
व्यवसायका लागि व्यवसाय दर्ता प्रमाणपत्र, स्थायी लेखा नम्बर तथा मूल्य अभिवृद्धि करसम्बन्धी प्रमाणपत्र आवश्यक पर्नेछ। व्यवसायको प्रकृतिअनुसार साझेदारी सम्झौता, प्रबन्धपत्र, नियमावली वा सञ्चालक समितिको निर्णयसमेत आवश्यक पर्न सक्नेछ।
वित्तीय विवरण र करसम्बन्धी कागजात
कर्जाका लागि बैंकको नीतिअनुसार लेखापरीक्षण गरिएको वा प्रारम्भिक वित्तीय विवरण तथा बिक्री वा करयोग्य नाफासम्बन्धी घोषणा पेस गर्नुपर्नेछ। ५० लाख रुपैयाँभन्दा बढीको कर्जा सीमाका लागि कर चुक्ता प्रमाणपत्र वा पेस गरिएको कर विवरण अनिवार्य हुने बैंकले जनाएको छ।
आवेदकले पछिल्लो ६ देखि १२ महिनाको बैंक खाताको विवरण तथा मौज्दात, लिनुपर्ने रकम र तिर्नुपर्ने रकमसम्बन्धी विवरणसमेत पेस गर्नुपर्नेछ।
धितोका लागि आवश्यक कागजात
धितो राखिने सम्पत्तिका लागि जग्गाधनी प्रमाणपुर्जा तथा पछिल्लो मालपोत तथा कर तिरेको रसिद आवश्यक पर्नेछ। त्यस्तै, नक्सा वा कित्ता नक्सा, वडा कार्यालयबाट जारी चार किल्ला विवरण, राजीनामा तथा स्थानीय वडा कार्यालयबाट प्राप्त अंशियारसम्बन्धी विवरण पेस गर्नुपर्नेछ।
निर्माण भएको सम्पत्ति धितो राख्ने अवस्थामा निर्माण सम्पन्न प्रमाणपत्र वा सम्बन्धित स्थानीय तहबाट स्वीकृत निर्माणसम्बन्धी कागजातसमेत आवश्यक पर्नेछ।
ग्लोबल आइएमई बैंकमा खाता अनिवार्य
कर्जा लिन चाहने ऋणी वा संस्थाको नाममा ग्लोबल आइएमई बैंकमा चालु खाता खोलिएको हुनुपर्नेछ। साथै, बैंकको निर्धारित कर्जा आवेदन फाराम पूर्ण रूपमा भरेर हस्ताक्षर गरी पेस गर्नुपर्नेछ।
शाखा वा सम्बन्धित अधिकारीमार्फत आवेदन
कृषि कर्जाका लागि इच्छुक ग्राहकले देशभर रहेका ग्लोबल आइएमई बैंकका कुनै पनि शाखामा सम्पर्क गरी आवेदन दिन सक्नेछन्। यसका साथै बैंकका कृषि वित्तीय सम्बन्ध अधिकृतसँग सम्पर्क गरी आफ्नो कर्जा योग्यता तथा धितोको मूल्यांकनसम्बन्धी प्रारम्भिक जानकारी लिएपछि औपचारिक आवेदन प्रक्रिया अघि बढाउन सकिने बैंकले जनाएको छ।
ग्लोबल आइएमई कृषि कर्जाले कृषि उत्पादन, पूर्वाधार, उपकरण, ढुवानी तथा व्यवसाय सञ्चालनका लागि आवश्यक वित्तीय स्रोत उपलब्ध गराउने लक्ष्य राखेको छ।
