राष्ट्रिय स्वतन्त्र पार्टी (रास्वपा)का सांसद द्वय सोविता गौतम र हरि ढकाल भारत जाँदैछन् । उनीहरु आज शनिबार साँझ बैंगलोर जान लागेका हुन् ।
पार्टीको कर्नाटक राज्य भेलालाई सम्बोधन गर्न उनीहरु त्यता जान लागेको बुझिएको छ । उनीहरुले भोलि बैंकटेस पुराको कमनहल्लीस्थित रामा टेम्पल हलमा आयोजना हुने कार्यक्रमलाई सम्बोधन गर्ने रास्वपाले जनाएको छ ।
त्यसअघि उनीहरु आज माइतीघर मण्डलामा आयोजना हुने पार्टी स्थापनाको कार्यक्रममा सहभागी हुँदैछन् । अहिले वनस्थलीस्थित घण्टीघरमा जारी केन्द्रीय समितिको बैठक सकेर सबै सांसदहरु माइतीघर जान लागेका हुन् । माइतीघरको कार्यक्रम सकेर सांसदहरु सिधै संसद भवन पुग्ने बताइएको छ ।
भिजिट भिसा प्रकरणमा गृहमन्त्रीको राजीनमा र उच्चस्तरी छानविनको माग गर्दै संसद अवरोध गर्दै आएका उनीहरु आज पनि नाराबाजीसहित प्रस्तुत हुने र बैठक बहिष्कार गर्नेसम्मको रणनीतिमा छन् ।
प्रतिनिधिसभा बैठक सकेर सांसद गौतम र ढकाल त्रिभुवन अन्तराष्ट्रिय विमानस्थलतिर लाग्ने कार्यक्रम छ ।
